Samirə Hüseynova: Şəhidlərin əziz xatirəsi qarşısında baş əyirik

27 Sentyabr – Anım Günü Azərbaycan xalqının yaddaşında həm hüzn, həm də qürur hissi ilə anılan müqəddəs tarixdir. Bu gün Vətən uğrunda canından keçən şəhidlərimizin xatirəsi qarşısında baş əyir, onların qəhrəmanlığını və fədakarlığını ehtiramla yad edirik. Azərbaycan xalqı tarix boyu öz milli varlığını, dövlətçilik ənənələrini və tarixi torpaqlarını qorumaq uğrunda mübarizə aparıb. XX əsrin əvvəllərində baş verən qanlı hadisələr, 1918–1920-ci illərin faciələri, 1948–1953-cü illərdə azərbaycanlıların indiki Ermənistan ərazisindəki tarixi yaşayış yerlərindən deportasiyası, 1988-ci ildən başlayaraq yüz minlərlə soydaşımızın doğma yurdlarından qovulması xalqımızın yaddaşında dərin izlər buraxıb. 1988-ci ildə başlayan Qarabağ münaqişəsi nəticəsində torpaqlarımız işğal olunub, yaşayış məntəqələrimiz dağıdılıb, yüz minlərlə insan doğma yurdlarından didərgin salınıb. Xocalı faciəsi isə xalqımızın yaşadığı ən ağır faciələrdən biri kimi tarixə düşüb. Azərbaycan uzun illər ərzində münaqişənin beynəlxalq hüquq normaları əsasında sülh yolu ilə həllinə çalışsa da, BMT Təhlükəsizlik Şurasının 822, 853, 874 və 884 saylı qətnamələrinin icrası təmin olunmayıb. 2016-cı ilin Aprel döyüşləri və 2020-ci ilin iyulunda Tovuz istiqamətində baş verən hadisələr isə xalqımızın işğalla heç vaxt barışmadığını bir daha nümayiş etdirib.

2020-ci il sentyabrın 27-də Ermənistan silahlı qüvvələrinin Azərbaycan Ordusunun mövqelərinə və yaşayış məntəqələrinə qarşı genişmiqyaslı hərbi təxribatı Vətən müharibəsinin başlanmasına səbəb oldu. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin əmri ilə Azərbaycan Ordusu əks-hücum əməliyyatına başladı. 44 gün davam edən Vətən müharibəsi Azərbaycan xalqının milli birliyinin və Ordumuzun qəhrəmanlığının möhtəşəm nümunəsinə çevrildi. Cəbrayıl, Füzuli, Zəngilan və Qubadlı şəhərləri, Hadrut qəsəbəsi, Şuşa və çoxsaylı yaşayış məntəqələri işğaldan azad edildi. Azərbaycan xalqı həmin günlərdə bir yumruq kimi birləşərək Ordumuzun və Ali Baş Komandanın yanında oldu. “Dəmir yumruq” ifadəsi yalnız hərbi gücün deyil, xalq-dövlət-ordu birliyinin də rəmzinə çevrildi. Vətən müharibəsinin ən mühüm hadisəsi 2020-ci il noyabrın 8-də Şuşanın azad edilməsi oldu. Şuşanın azad olunmasından sonra imzalanan üçtərəfli Bəyanatla Ağdam, Kəlbəcər və Laçın rayonlarının Azərbaycana qaytarılması təmin edildi. Beləliklə, Azərbaycan Ordusu döyüş meydanında öz gücünü və peşəkarlığını nümayiş etdirərək xalqımızın illərlə həsrətində olduğu Zəfəri qazandı.

Lakin Azərbaycanın Zəfər yolu 2020-ci ilin noyabrında başa çatmadı. 2023-cü il sentyabrın 19–20-də həyata keçirilən lokal xarakterli antiterror tədbirləri nəticəsində Azərbaycanın bütün ərazisində dövlət suverenliyi tam bərpa edildi. Bununla uzun illər davam edən separatizmə son qoyuldu və Azərbaycan Respublikasının Konstitusiya quruluşu ölkənin bütün ərazisində təmin edildi. 2023-cü il oktyabrın 15-də Prezident İlham Əliyevin Xankəndidə, Xocalıda, Xocavənddə və Ağdərədə Azərbaycan Bayrağını ucaltması bu tarixi prosesin mühüm rəmzinə çevrildi. Bu gün şəhidlərimizin uğrunda can verdiyi torpaqlarda Azərbaycan Bayrağı dalğalanır, Qarabağ və Şərqi Zəngəzurda genişmiqyaslı quruculuq işləri aparılır. Dağıdılmış şəhər və kəndlər yenidən qurulur, yollar, məktəblər, xəstəxanalar və digər infrastruktur obyektləri yaradılır. Ən böyük tarixi hadisələrdən biri isə Böyük Qayıdış prosesidir. 2026-cı ilin sentyabrına olan rəsmi məlumata görə, artıq təxminən 40 min keçmiş məcburi köçkün azad edilmiş ərazilərə qayıdıb, Qarabağ və Şərqi Zəngəzurda isə 90 mindən çox insan yaşayır. Bu gün doğma yurdlarına qayıdan insanların sevinci şəhidlərimizin müqəddəs amalının gerçəkləşməsinin ən böyük göstəricilərindən biridir.

Şəhidlərimizin xatirəsinin əbədiləşdirilməsi dövlətimizin və xalqımızın mühüm mənəvi vəzifələrindəndir. Prezident İlham Əliyevin 2 dekabr 2020-ci il tarixli Sərəncamına əsasən hər il sentyabrın 27-si Azərbaycanda Anım Günü kimi qeyd olunur və həmin gün saat 12:00-da ölkə ərazisində bir dəqiqəlik sükutla şəhidlərimizin xatirəsi yad edilir. Bakıda yaradılan Zəfər Parkı və 2025-ci ildə açılan Zəfər Muzeyi də Vətən müharibəsinin, şəhidlərimizin və qəhrəman əsgər-zabitlərimizin tarixdəki yerini gələcək nəsillərə çatdıran mühüm yaddaş məkanlarıdır. Muzeydə Qarabağın tarixi, 44 günlük Vətən müharibəsi, Şuşanın azad olunması, qəhrəmanlarımızın döyüş yolu, 20 sentyabr 2023-cü ildə dövlət suverenliyinin bərpası və Qarabağda həyata keçirilən dirçəliş prosesi əks olunur. Dövlətimiz şəhid ailələrinə və qazilərə də daim xüsusi diqqət və qayğı göstərir. Onların sosial müdafiəsinin gücləndirilməsi, müalicə və reabilitasiyası, mənzil-məişət şəraitinin yaxşılaşdırılması istiqamətində ardıcıl tədbirlər həyata keçirilir. “YAŞAT” Fondunun fəaliyyəti də bu qayğının mühüm istiqamətlərindən biridir. Şəhid ailələrinin və müharibə ilə əlaqədar əlilliyi müəyyən edilmiş şəxslərin müxtəlif ehtiyaclarının qarşılanmasına göstərilən dəstək dövlətin öz qəhrəman övladlarına münasibətinin göstəricisidir.

27 Sentyabr – Anım Günü bizə bir daha xatırladır ki, Azərbaycanın bugünkü Zəfəri böyük fədakarlıq və ağır itkilər hesabına əldə olunub. Şəhidlərimizin hər biri xalqımızın qəhrəmanlıq salnaməsinin ayrılmaz hissəsidir. Onların qanı ilə azad edilən torpaqlarda bu gün yeni həyat qurulur, doğma yurdlarına qayıdan insanlar öz evlərində yaşayır, üçrəngli bayrağımız Qarabağ və Şərqi Zəngəzurun hər yerində qürurla dalğalanır. Azərbaycan Respublikasının Prezidenti İlham Əliyevin sözləri ilə desək, “Bu Qələbəni bizə bəxş edən qəhrəman əsgər və zabitlərimiz bizim qürur mənbəyimizdir.” Şəhidlərimizin əziz xatirəsi Azərbaycan xalqının qəlbində əbədi yaşayacaq. Onların bizə əmanət etdiyi Zəfəri qorumaq, dövlətçiliyimizi daha da möhkəmləndirmək və Vətənimizin gələcəyinə layiq olmaq hər birimizin mənəvi borcudur.

27 Sentyabr 2026, 13:56 - 252