Emin Tarverdiyev: Regionlarda ictimai fəallığın artması dövlət-vətəndaş həmrəyliyini daha da gücləndirir

Vətəndaş cəmiyyəti institutlarının inkişafı, regionlarda ictimai təşəbbüskarlığın genişləndirilməsi və qarşılıqlı əməkdaşlıq əlaqələrinin dərinləşdirilməsi ölkəmizdə həyata keçirilən dövlət siyasətinin əsas prioritetlərindəndir. Bu baxımdan Qədim Nizami yurdu – Gəncə şəhərində reallaşan IV Əməkdaşlıq Forumu ictimai sektorun fəaliyyətində mühüm mərhələyə çevrilib. Tədbirin əhəmiyyəti, rəqəmsal çağırışlar və qazanılan təcrübə barədə fikirlərini bölüşən “Vətən Bağı” Sosial Təşəbbüslər İctimai Birliyinin sədri Emin Tarverdiyev bildirib: Gəncədə keçirilən Azərbaycan QHT-lərinin IV Əməkdaşlıq Forumu vətəndaş cəmiyyətinin inkişafı baxımından həqiqətən də çox önəmli və yaddaqalan bir platforma oldu. Nizami yurdunda — Gəncədə belə mötəbər bir tədbirin təşkili həm regionlarda ictimai fəallığın artırılmasına, həm də paytaxt və bölgə təşkilatları arasında canlı ünsiyyətin qurulmasına böyük təkan verir. "Vətən Bağı" Sosial Təşəbbüslər İctimai Birliyi olaraq, biz də bu forumda fəal iştirak etdik və müzakirə olunan hər bir mövzunun vacibliyini yerindəcə hiss etdik.

Forum ilk növbədə bizə təcrübə mübadiləsi aparmaq, yeni əməkdaşlıq körpüləri salmaq və ümumi məqsədlərimiz ətrafında sıx birləşmək üçün gözəl imkan yaratdı. Bu gün vətəndaş cəmiyyətinin daha da güclənməsi üçün QHT-lərin pərakəndə deyil, koordinasiyalı və qarşılıqlı dəstək prinsipi ilə çalışması hava və su kimi lazımdır. Məhz belə forumlar və görüşlər təşkilatlar arasında etimadı möhkəmləndirir, ortaq ictimai təşəbbüslərin və faydalı layihələrin doğulmasına zəmin hazırlayır.

Eyni zamanda, forumda vurğulandığı kimi, müasir dövrün çağırışları bizdən ənənəvi iş üsullarından bir qədər irəli getməyi tələb edir. İndi sadəcə tədbir keçirməklə iş bitmir; rəqəmsal alətlərdən, sosial media imkanlarından və hətta süni intellekt texnologiyalarından səmərəli istifadə etmək şərtə çevrilib. Bu yenilikləri fəaliyyətimizə tətbiq etdikdə, gördüyümüz işlər, həyata keçirdiyimiz layihələr daha geniş auditoriyaya çatır və cəmiyyətə daha real, ölçülə bilən töhfə verir.

Şəxsi təcrübəmdən deyə bilərəm ki, canlı ünsiyyət, göz-gözə aparılan müzakirələr hər zaman ən yaxşı nəticəni verir. Gəncə forumu da göstərdi ki, bizim bir-birimizdən öyrənəcəyimiz, çiyin-çiyinə verib həyata keçirəcəyimiz hələ çox layihələr var. Belə yüksək səviyyəli təşkilatçılığa görə əməyi keçən hər kəsə, bütün təşkilatçı heyətə dərin minnətdarlığımı bildirirəm. Arzu edirəm ki, bu cür faydalı görüşlər ənənəvi hal alsın, davamlı olsun və vətəndaş cəmiyyətimizin inkişafına yeni-yeni töhfələr versin.

7 Noyabr 2026, 15:09 - 109