Samirə Hüseynova: Zəfərin gücü xalq birliyində, qəhrəmanlıqda və milli iradədə təcəssüm etdi

Azərbaycan xalqının 2020-ci ildə qazandığı tarixi Qələbə yalnız hərbi uğur deyil, milli birliyin, sarsılmaz iradənin, qəhrəmanlığın və dövlətçilik əzminin möhtəşəm təntənəsi idi. 8 Noyabr – Zəfər Günü xalqımızın yaddaşına əbədi həkk olunmaqla yanaşı, Azərbaycanın gücünü, öz torpaqlarını azad etmək əzmini və milli həmrəyliyini bütün dünyaya nümayiş etdirdi. Bu Qələbənin arxasında Azərbaycan əsgərinin şücaəti, şəhidlərimizin müqəddəs qanı, qazilərimizin fədakarlığı, xalqımızın birliyi və Ali Baş Komandanın qətiyyətli rəhbərliyi dayanırdı. 44 günlük Vətən müharibəsi Azərbaycan Ordusunun döyüş meydanında göstərdiyi qəhrəmanlıq nümunələri ilə tarixə yazıldı. Hərbçilərimiz böyük çətinliklərə, mürəkkəb relyefə və düşmənin müqavimətinə baxmayaraq, qarşıya qoyulan vəzifələri yüksək peşəkarlıqla yerinə yetirirdilər. Onlar Vətənin azadlığı naminə canlarından keçməyə hazır olduqlarını döyüş meydanında sübut etdilər. Yaralı əsgər və zabitlərimizin müalicədən sonra yenidən cəbhəyə qayıtmaq istəyi, hərbi qulluqçularımızın “öldü var, döndü yoxdur” əzmi milli ruhun və Vətənə sədaqətin parlaq təzahürü idi. Azərbaycan Ordusunda bir nəfər də fərarinin olmaması, Ermənistan ordusunda isə müharibə dövründə 10 mindən çox fərarinin qeydə alınması tərəflərin mənəvi-psixoloji vəziyyətini xarakterizə edən mühüm göstəricilərdən idi.

Bu müharibədə Azərbaycan xalqı da öz sözünü dedi. Cəbhədə döyüşən hərbçilərimiz arxa cəbhədə milyonlarla insanın dəstəyini hiss edirdilər. Ölkənin bütün bölgələrində yaşayan vətəndaşlar, müxtəlif etnik və dini mənsubiyyətə malik insanlar Vətənin müdafiəsi naminə vahid mövqedən çıxış etdilər. Minlərlə insan könüllü olaraq orduya yazıldı, xalqımızın nümayiş etdirdiyi həmrəylik müharibənin mənəvi dayaqlarından birinə çevrildi. Cəbhə bölgəsində yaşayan sakinlərin ağır şəraitə baxmayaraq doğma evlərini tərk etməməsi də xalqın iradəsinin göstəricisi idi. Beləliklə, ön və arxa cəbhə arasında sarsılmaz birlik formalaşdı. “Dəmir yumruq” ifadəsi məhz bu milli həmrəyliyin rəmzinə çevrildi. Dünyanın müxtəlif ölkələrində yaşayan azərbaycanlılar Azərbaycanın haqq səsinin beynəlxalq ictimaiyyətə çatdırılması, erməni lobbisinin apardığı təbliğat kampaniyalarına qarşı mübarizə aparılması istiqamətində fəallıq göstərdilər. Müharibə dövründə siyasi partiyaların da milli məsələlərdə vahid mövqedən çıxış etməsi xüsusi əhəmiyyət daşıyırdı. Ali Baş Komandanın rəhbərliyinə dəstək ifadə edən birgə bəyanatlar ölkədə Vətənin taleyi ilə bağlı məsələlərdə siyasi həmrəyliyin nümayişi oldu. Bu birlik Azərbaycan cəmiyyətinin milli maraqlar ətrafında birləşmək gücünü ortaya qoydu.

Vətən müharibəsinin digər mühüm cəbhəsi informasiya və diplomatiya sahəsi idi. Azərbaycan öz haqq mübarizəsinin mahiyyətini dünyaya çatdırmaq, Ermənistanın təbliğatına qarşı həqiqətləri beynəlxalq ictimaiyyətə təqdim etmək üçün geniş informasiya fəaliyyəti həyata keçirirdi. Prezident İlham Əliyevin müharibə dövründə dünyanın aparıcı media qurumlarına verdiyi 30-dan çox müsahibə bu mübarizənin mühüm tərkib hissəsi oldu. Dövlət başçısı müxtəlif ölkələrin televiziya kanallarına və nüfuzlu informasiya vasitələrinə verdiyi müsahibələrdə münaqişənin tarixi səbəblərini, Azərbaycanın beynəlxalq hüquqa əsaslanan mövqeyini, Ermənistanın təxribatlarını və işğal siyasətini ardıcıl şəkildə izah edirdi. Bu müsahibələr Azərbaycanın həqiqətlərinin geniş auditoriyaya çatdırılmasına, beynəlxalq informasiya məkanında ölkəmizin mövqeyinin güclənməsinə mühüm töhfə verdi.

Prezidentin müharibə dövründəki çıxışları və müraciətləri də xalqın mənəvi ruhunun yüksəlməsində xüsusi rol oynadı. Dövlət başçısının qətiyyətli mövqeyi, hadisələrə aydın münasibəti və gələcəyə inam ifadə edən fikirləri cəmiyyətin bütün təbəqələrində böyük ruh yüksəkliyi yaradırdı. İnsanlar Prezidentin çıxışlarında yalnız dövlət rəhbərinin mövqeyini deyil, həm də xalqın arzu və istəklərinin ifadəsini görürdülər. Bu çıxışlar müharibənin çətin günlərində vətəndaşların inamını möhkəmləndirir, qələbəyə aparan yolda mənəvi dayaq rolunu oynayırdı. Azərbaycanın diplomatik mübarizəsi hərbi əməliyyatlarla paralel şəkildə davam edirdi. Ölkəmiz beynəlxalq hüquqa əsaslanan mövqeyini qoruyur, münaqişənin mahiyyəti ilə bağlı həqiqətləri müxtəlif beynəlxalq platformalarda diqqətə çatdırırdı. Müharibə dövründə Azərbaycanın diplomatik fəaliyyəti ölkəmizə qarşı yönəlmiş təzyiq cəhdlərinin qarşısının alınmasında mühüm əhəmiyyət daşıdı. Beləliklə, Azərbaycan həm döyüş meydanında, həm də informasiya və diplomatiya sahəsində öz qətiyyətini nümayiş etdirdi.

Zəfərin əsasını təşkil edən amillərdən biri də xalqın dövlətinə və ordusuna olan inamı idi. Şəhidlərimizin qəhrəmanlığı, qazilərimizin fədakarlığı, əsgər və zabitlərimizin peşəkarlığı, arxa cəbhədə çalışan insanların əzmkarlığı vahid məqsəd ətrafında birləşərək tarixi Qələbəni mümkün etdi. Bu Qələbə göstərdi ki, milli birlik yalnız çətin günlərdə nümayiş etdirilən hiss deyil, dövlətin gücünü müəyyən edən fundamental dəyərdir.

8 Noyabr – Zəfər Günü bu gün də xalqımızı eyni amal ətrafında birləşdirən, gələcək nəsillərə vətənpərvərlik, cəsarət və fədakarlıq nümunəsi aşılayan müqəddəs tarixdir. Qazanılan Qələbə şəhidlərimizin əziz xatirəsinə ehtiram, qazilərimizin xidmətlərinə minnətdarlıq və Azərbaycan dövlətinin qüdrətinə qürur hissi ilə yaşayır. Zəfərin ən böyük dərslərindən biri isə budur: xalqın birliyi, güclü dövlət və milli iradə bir araya gəldikdə heç bir qüvvə Azərbaycanın haqq yolunu dayandıra bilməz.

Samirə Adəm qızı Hüseynova

5 Noyabr 2026, 22:06 - 7