"Qarabağ" Avropanı silkələdi

Ağdam təmsilçisi bu gün Bakıda böyük uğura imza atıb. Tofiq Bəhramov adına Respublika Stadionunda keçirilən cavab görüşündə "Qarabağ" Macarıstanın "Ferensvaroş" klubunu qəbul edib. Görüş saat 20:45-də start götürüb.

Matçı dünyanın ən tanınmış hakimlərindən biri – fransalı Kleman Tyurpen idarə edib. Qeyd edək ki, Tyurpen 2022-ci ildə Çempionlar Liqasının ("Liverpul" – "Real"), 2021-ci ildə isə Avropa Liqasının ("Vilyareal" – "Mançester Yunayted") final oyunlarının da baş hakimi olub.

İlk qarşılaşmada səfərdə 3:1 hesabı ilə qalib gələn Qurban Qurbanovun komandası cavab matçında isə 2:3 hesabı ilə məğlub olsa da, iki oyunun nəticəsinə görə ümumi üstünlüyü qoruyaraq tarixində ikinci dəfə Çempionlar Liqasının əsas mərhələsinə yüksəldi.

Xatırladaq ki, "Qarabağ" daha əvvəl – 2017-ci ildə də Avropanın ən mötəbər klub turnirinin qrup mərhələsində mübarizə aparmışdı.