Şirvan məktəbində Sülh Günü

21 sentyabr – Beynəlxalq Sülh Günü münasibətilə Şirvan şəhəri Elçin İmanov adına 10 nömrəli tam orta ümumtəhsil məktəbində geniş tədbir təşkil olunub. Məktəbin müəllim və şagird kollektivinin iştirakı ilə keçirilən tədbirin məqsədi sülhün bəşəri dəyər kimi təbliği, gənc nəslin bu amal ətrafında birləşməsi, həmçinin şagirdlərdə humanizm, tolerantlıq və qarşılıqlı hörmət hisslərinin gücləndirilməsi olub.

Tədbir Azərbaycan Respublikasının Dövlət Himninin səsləndirilməsi ilə açıq elan edilib. Ardınca Ulu Öndər Heydər Əliyevin xatirəsi, eləcə də Vətənin azadlığı və müstəqilliyi uğrunda şəhid olmuş qəhrəmanların ruhu bir dəqiqəlik sükutla yad olunub.

Şagirdlərin ifasında ədəbi-bədii kompozisiya, sülh mövzusunda şeirlər, vətənpərvərlik və dostluq ideyalarını əks etdirən mahnılar və rəqs nömrələri təqdim olunub. Çıxışlar iştirakçılar tərəfindən alqışlarla qarşılanıb, sülhün qorunmasının və xalqlar arasında həmrəyliyin önəmi bir daha diqqətə çatdırılıb.

Məktəbin direktoru Zümrüd Əliyeva çıxışında qeyd edib ki, sülh insanlığın ən böyük arzusu və ali nemətidir. Onun sözlərinə görə, müasir dövrdə sülhün möhkəmləndirilməsi üçün hər bir vətəndaş, xüsusilə gənclər üzərinə mühüm vəzifələr düşür. “Gənclərin dostluq, əməkdaşlıq, tolerantlıq və milli-mənəvi dəyərlər ruhunda tərbiyəsi gələcəyin etibarlı təminatıdır”, – deyə Z.Əliyeva vurğulayıb.

Tədbir “Sülh Günü”nə həsr olunmuş videoçarxın nümayişi ilə yekunlaşıb.