Xatir Əliyev: Bir şəhid, bir tarix – Rəmzi Novruzovun qəhrəmanlığı

Vətən – bu sözün içində bir millətin ruhu, tarixi, mədəniyyəti və ən əsası sevgisi gizlənib. Vətən bizim doğulub boya-başa çatdığımız, ilk addımlarımızı atdığımız, ana laylasını eşitdiyimiz müqəddəs torpaqdır. O torpaq ki, uğrunda canlar verilib, şəhidlər qan töküb, analar göz yaşı axıdıb. Vətən təkcə dağ, daş, çay, meşə deyil – Vətən bizik, bizim ruhumuz, kimliyimiz, keçmişimiz və gələcəyimizdir.
Hər bir insan üçün vətən müqəddəsdir. İnsan harada yaşamasından, hansı peşəyə sahib olmasından, hansı dili danışmasından asılı olmayaraq, doğma vətəni onun üçün hər şeydən dəyərlidir. Çünki Vətən bizə ad verir, kimlik qazandırır, bizi dünyaya tanıdır. Ana laylası, ilk məktəb yolu, qürurla oxunan dövlət himni – bütün bunlar Vətənin bizə bəxş etdiyi mənəvi sərvətlərdir.
Bu dəyərin qorunması üçün isə tarix boyu Azərbaycan xalqı ağır sınaqlardan keçmişdir. XX əsrin sonunda başlayan və xalqımız üçün böyük faciələrə yol açan Qarabağ münaqişəsi, 30 ildən artıq davam edən ədalətsiz işğal dövrü bizə bir daha göstərdi ki, azadlıq və torpaq heç vaxt hədiyyə olunmur – o, mübarizə ilə qazanılır.
Nəhayət, 2020-ci ilin sentyabrında başlayan 44 günlük Vətən müharibəsi xalqımızın qürur salnaməsinə qızıl hərflərlə yazıldı. Bu müharibə təkcə silahların deyil, həm də iradənin, birliyin və xalqın inamının savaşına çevrildi. Azərbaycan Ordusu Müzəffər Ali Baş Komandanın rəhbərliyi ilə işğal altındakı torpaqları bir-bir azad etdi. Şuşa, Cəbrayıl, Füzuli, Zəngilan, Qubadlı, Laçın, Kəlbəcər – hər biri Zəfərin müjdəsi oldu.
Bu Zəfər naminə minlərlə qəhrəman oğul canından keçdi, şəhidlik zirvəsinə ucaldı. Onların qanı ilə suvarılmış torpaq bu gün bizim üçün daha da əziz və müqəddəsdir. Bu müqəddəs torpaqlar uğrunda canını fəda edənlər sırasında 1-ci Qarabağ müharibəsinin qəhrəman şəhidləri də var idi. Onlar vətənin ağır günlərində, çətin şəraitdə silaha sarıldılar, qardaşlarını, torpaqlarını, gələcəklərini qorumaq üçün döyüşdülər. O igidlərdən biri də Rəmzi Novruzov kimi şəhidlər idi – torpağına sahib çıxmaq üçün həyatını göz qırpmadan fəda edən mərd Azərbaycan övladları.
Rəmzi Novruzov 11 avqust 1971-ci ildə İsmayıllı rayonunun Basqal qəsəbəsində anadan olmuşdur. Orta təhsilini doğma qəsəbəsində — Basqal qəsəbə tam orta məktəbində almışdır.
1989-cu ildə hərbi xidmətə çağırılan Rəmzi Novruzov 1991-ci ildə xidmətini Türkmənistanın Kuşka şəhərində başa vurmuşdur. Həmin il Ermənistanın Azərbaycana qarşı hərbi təcavüzünün geniş vüsət alması ilə 1-ci Qarabağ müharibəsi başlamış, vətənin müdafiəsi üçün könüllülər ön xəttə yollanmışdır. Rəmzi Novruzov da bu döyüşlərə qoşulmuş və 1992-ci ilin may ayında Laçın batalyonunun tərkibində hərbi xidmətini davam etdirmişdir.
Laçın istiqamətində gedən ağır döyüşlərdə iştirak edən Rəmzi Novruzov, Pircahan, Hoçaz, Bozgüney, Sonasar, Soyuqbulaq və digər kəndlərin müdafiəsində böyük igidlik göstərmişdir. O, döyüşçü tağımının kiçik komandiri kimi ön cəbhədə fəal vuruşmuş, silahdaşları ilə birlikdə düşmənin irəliləməsinin qarşısını almağa çalışmışdır.
Rəmzi Novruzovun son döyüşü 2 sentyabr 1992-ci ildə Ağdərə istiqamətində yerləşən Vəngli kəndi uğrunda gedən şiddətli döyüşlər zamanı olmuşdur. Həmin döyüşdə qəhrəmancasına şəhid olmuşdur.
Onun məzarı Basqal qəsəbə qəbiristanlığında yerləşir. Doğma məktəbi – Basqal qəsəbə tam orta məktəbi isə bu igid şəhidin adını daşıyır və onun xatirəsini əziz tutur.
Bu gün biz azad Qarabağda üçrəngli bayrağımızı qürurla dalğalandırırıqsa, bu, məhz şəhidlərimizin və qazilərimizin qəhrəmanlığı sayəsində mümkün olub. Onlar Vətənin əbədiyyətini öz ölümsüzlüyü ilə təmin etdilər.
Unutmayaq: Vətən uğrunda can verənlər unudulmaz, onların adları tarixdə yaşayar, qəlblərdə əbədi olar. Biz onların göstərdiyi yolla irəliləməli, Vətənə layiqli vətəndaş olmalıyıq. Vətənə xidmət yalnız döyüş meydanında yox, eyni zamanda biliklə, zəhmətlə, sədaqətlə də olur.
Vətən bizimdir – onu qorumaq, sevmək və yaşatmaq hər birimizin borcudur.

Xatir Əliyev
"Basqal" Dövlət Tarix-Mədəniyyət Qoruğunun əməkdaşı