Turan Adayev: Qələmini silah edən Salatın

Azərbaycanın müstəqillik uğrunda apardığı mübarizənin ən çətin, ən qanlı və unudulmaz səhifələrindən biri Birinci Qarabağ müharibəsi olmuşdur. Bu müharibə yalnız silahlı qarşıdurma deyildi – bu, həm də milli kimliyimizin, varlığımızın, haqq səsimizin müdafiəsi uğrunda aparılan ümummilli savaş idi.
Müharibə şəraitində xalqın haqq səsini, baş verənləri dünya ictimaiyyətinə çatdırmaq, informasiya cəbhəsində mübarizə aparmaq böyük cəsarət tələb edirdi. Bu mübarizədə təkcə əsgərlər deyil, sözün gücünə inanan, qələm və kamera ilə döyüşən qəhrəman jurnalistlər də ön cəbhədə yer alırdılar. Onlar çətin döyüş bölgələrinə yollanır, atəş altında reportaj hazırlayır, xalqın ağrısını, qəhrəmanlığını, Vətən sevgisini dünyaya göstərirdilər.
Belə jurnalistlərdən biri də Salatın Əsgərova idi. O, öz peşəsini təkcə yazmaq vasitəsi deyil, bir vətənpərvərlik missiyası kimi qəbul edirdi. Döyüş bölgələrinə tək getməkdən, təhlükəli yollara çıxmaqdan çəkinmirdi. Onun qələmi təkcə xəbərləri deyil, haqqı və ədaləti yazırdı. O, xalqın harayını, torpağın dərdini, şəhidlərin izzətini sözlə ucaldırdı. Salatın Əsgərova 16 dekabr 1961-ci ildə Bakı şəhərində ziyalı ailəsində dünyaya gəlmişdi. O, uşaqlıqdan zəhmətsevərliyi, əzmkarlığı və güclü iradəsi ilə seçilirdi. Məktəbi əla qiymətlərlə bitirən Salatın 1979-cu ildə Azərbaycan Neft və Kimya İnstitutuna daxil oldu və geofizika ixtisası üzrə mühəndis kimi məzun oldu. Lakin onun qəlbi jurnalistikaya bağlı idi.
1984-cü ildən etibarən o, mətbuat sahəsində çalışmağa başladı. Əvvəlcə “Bakı” qəzetində, sonra isə “Molodyoj Azerbaydjana” qəzetində fəaliyyət göstərdi. Onun yazılarında əsas mövzu torpaqlarımızın bütövlüyü, xalqımızın mübarizəsi və ədalətsizliyə qarşı çıxmaq idi. Salatın tez-tez cəbhə xəttinə gedir, münaqişə bölgələrindən birbaşa reportajlar hazırlayırdı. Hətta ailəsi onun bu qədər təhlükəyə atılmasından narahat olsa da, o, “Vətən həqiqətləri yazılmalıdır” deyərək yolundan dönmürdü. 1991-ci il yanvarın 9-da Salatın Əsgərova Laçından Şuşaya gedərkən Qaladərəsi kəndi yaxınlığında erməni silahlı birləşmələri tərəfindən pusquya salındı və qəddarcasına qətlə yetirildi. Onun içində olduğu hərbi maşın 113 güllə izi ilə deşilmişdi. Bu hücum nəticəsində Salatınla yanaşı onu müşayiət edən hərbçilər – mayor İqor İvanov, podpolkovnik Oleq Larionov və sürücü də şəhid oldular. Salatın Əsgərova Azərbaycanın Birinci Qarabağ müharibəsində həlak olan ilk qadın jurnalist kimi tarixə düşdü.
Onun ölümü təkcə Azərbaycan mətbuatı üçün deyil, bütün xalqımız üçün böyük itki oldu. Lakin o, sözün gücü ilə yazdığı həqiqətlər və göstərdiyi cəsarətlə gələcək nəsillərə örnək oldu.
Salatın Əsgərova 1992-ci il noyabrın 6-da Azərbaycan Respublikasının Prezidenti Əbülfəz Elçibəyin fərmanı ilə ölümündən sonra Azərbaycanın Milli Qəhrəmanı adına layiq görüldü. Hazırda onun adı küçələrə, məktəblərə, gəmilərə verilib. Bakıda yaşadığı binada xatirə lövhəsi yerləşdirilib, Təfəkkür Universitetində büstü qoyulub. Hətta onun həlak olduğu kəndin adı da bu gün Salatınkənd adlanır.
Salatın Əsgərova bir qadın olaraq həm jurnalist, həm vətəndaş, həm də qəhrəman kimi tarixə adını yazdırdı. O, bizə öyrətdi ki, Vətən uğrunda döyüş təkcə silahla yox, sözlə də aparılır. Onun həyat yolu hər bir gənc üçün örnək olmalı, qəhrəman ruhu isə daim yaşadılmalıdır.

Turan Adayev, Qəbələ Dövlət Peşə Təhsil Mərkəzinin II kurs tələbəsi