Xıdır Nəbi ovqatında əməkdaşlıq

Elitar Biznes Club-un təşkilatçılığı ilə növbəti işgüzar görüş keçirilib. Müxtəlif sahələri təmsil edən sahibkar və iş adamlarının iştirak etdiyi görüşdə yeni əməkdaşlıq imkanları, birgə layihələr və biznes mühitində tərəfdaşlıq perspektivləri müzakirə olunub.
Tədbiri giriş nitqi ilə açan Elitar Biznes Club-un rəhbəri Elməddin Məmmədov platformanın əsas məqsədinin sahibkarlar arasında etibarlı əlaqələrin qurulması və real biznes təşəbbüslərinin formalaşdırılması olduğunu bildirib. O qeyd edib ki, bu cür görüşlər işgüzar mühitdə qarşılıqlı inamın və uzunmüddətli əməkdaşlığın möhkəmlənməsinə xidmət edir.
Görüş çərçivəsində milli-mənəvi dəyərlərimizdən olan Xıdır Nəbi bayramı da xüsusi olaraq qeyd edilib. Qışın sonuna doğru ümid, bərəkət və yenilənmə rəmzi kimi qəbul edilən bu ənənəvi bayram tədbirə mənəvi çalar qatıb və iştirakçılar tərəfindən səmimi ab-havada qarşılanıb.
Tədbirin əsas məruzəçisi “Vətən Bağı” Sosial Təşəbbüslər İctimai Birliyinin sədri Emin Tarverdiyev olub. O, çıxışında müasir dövrdə biznesin yalnız mənfəət yönümlü fəaliyyətlə məhdudlaşmadığını, sosial məsuliyyətin artıq strateji yanaşma kimi qəbul edildiyini vurğulayıb. Emin Tarverdiyev bildirib ki, güclü iqtisadiyyatın formalaşması üçün güclü və sabit cəmiyyət əsas şərtdir və bu baxımdan sosial layihələrə sistemli dəstək mühüm əhəmiyyət daşıyır.
O qeyd edib ki, sosial təşəbbüslərə dəstək xeyriyyəçilik aktı kimi deyil, uzunmüddətli və dayanıqlı investisiya kimi qiymətləndirilməlidir. Gənclərin inkişafı, regionlarda təşəbbüslərin stimullaşdırılması, sosial sahibkarlığın təşviqi və ictimai həmrəyliyin gücləndirilməsi istiqamətində biznes sektorunun daha fəal iştirakı vacibdir.
Çıxışı zamanı Xıdır Nəbi bayramının fəlsəfi mahiyyətinə də toxunan Emin Tarverdiyev bu ənənənin ümid və səbr ideyalarını təcəssüm etdirdiyini bildirib. Onun sözlərinə görə, torpağa atılan toxumun gec-tez cücərməsi inancı sosial və iqtisadi təşəbbüslər üçün də aktualdır və bu gün atılan düzgün addımlar sabahın dayanıqlı inkişafının əsasını təşkil edir.
Görüş çərçivəsində iştirakçılar arasında geniş fikir mübadiləsi aparılıb, gələcək əməkdaşlıqlar üçün ilkin razılaşmalar əldə olunub və sosial layihələrə sistemli dəstək mexanizmləri ətrafında müzakirələr keçirilib.
Səmimi və məhsuldar mühitdə baş tutan tədbir iştirakçılar üçün həm bayram ovqatı, həm də yeni biznes əlaqələrinin qurulması baxımından əlamətdar olub.
Sonda qonaqlara Xıdır Nəbi ovqatlı hədiyyə paketləri təqdim olunub.