İsmayıllıda “Dini ibadət yerləri memarlıq irsimizin tərkib hissəsi kimi” mövzusunda tədbir keçirilib

16 iyun tarixində İsmayıllı şəhəri Əbulhəsən Ələkbərzadə küçəsi 171 ünvanında yerləşən XIX əsrə aid inventar nömrəsi 4356 olan Məscidin ərazisində yerləşən Tələbə yataqxanasının akt zalında Azərbaycan Respublikasında 2026-cı ilin Şəhərsalma və Memarlıq İli” elan edilməsi haqqında Azərbaycan Respublikası Prezidentinin 22 dekabr 2025-ci il tarixli Sərəncamının icrası məqsədilə “Dini ibadət yerləri memarlıq irsimizin tərkib hissəsi kimi” başlığı altında tədbir keçirilib.

Tədbir Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Qəbələ Regional İdarəsinin İsmayıllı rayonu üzrə nümayəndələrinin və Dini Qurumlarla İş üzrə Dövlət Komitəsinin (DQİDK) Dağlıq Şirvan Regional bölməsinin birgə təşkilatçılığı ilə reallaşdı.

Tədbir DQİDK-nın Dağlıq Şirvan Regional bölməsinin əməkdaşı Aydın Səmədovun, İsmayıllı rayon İcra Hakimiyyəti Başçısının İsmayıllı şəhər İnzibatı Ərazi Dairəsi üzrə nümayyəndəsi Qiyas Abdullayevin, İsmayıllı şəhər Bələdiyyəsinin sədr müavini Anar Rəsulovun, Basqal Dövlət Tarix-Mədəniyyət Qoruğunun direktoru Ceyhun İsmayılovun, Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Qəbələ Regional İdarəsinin İsmayıllı rayonu üzrə baş mütəxəssislərinin və din xadimlərinin iştirakı ilə baş tutub.

Tədbir çərçivəsində rayon ərazisində yerləşən dini-tarixi abidələri əks etdirən xüsusi fotosərgi də nümayiş olunub.

Tədbirdə çıxış edən natiqlər bildiriblər ki, Azərbaycanın zəngin memarlıq irsinin, xüsusilə də dini-tarixi abidələrin qorunması, gələcək nəsillərə çatdırılması və təbliği dövlətimizin mədəni siyasətinin prioritet istiqamətlərindən biridir. Qeyd olunub ki, 2026-cı ilin “Şəhərsalma və Memarlıq İli” elan edilməsi bu istiqamətdə görülən işlərə yeni bir təkan verir və tarixi abidələrin mühafizəsi sahəsində ictimai məsuliyyəti artırır.

Tədbir diskussiya şəklində davam edib. İştirakçılar İsmayıllı rayonunda yerləşən memarlıq abidələrinin cari vəziyyəti, onların bərpası, konservasiyası və turizm potensialının artırılması ilə bağlı fikir mübadiləsi aparıblar. Həmçinin, dini abidələrin tarixi simasının saxlanılmaqla yanaşı, onların şəhərsalma mədəniyyətindəki yeri və əhəmiyyəti ətrafında müzakirələr təşkil edilib.

Tədbirin əsas məqsədi:

Azərbaycan Respublikası Prezidentinin “2026-cı ilin Şəhərsalma və Memarlıq İli” elan edilməsi haqqında Sərəncamının icrasını təmin etmək;
İsmayıllı rayonu ərazisindəki dini-tarixi memarlıq abidələrinin qorunması, onların tarixi əhəmiyyətinin təbliği və bu sahədə maarifləndirmə işlərinin gücləndirilməsi.
Mədəni irsin mühafizəsi ilə məşğul olan dövlət qurumları, yerli icra hakimiyyəti, bələdiyyələr və din xadimləri arasında əməkdaşlığı inkişaf etdirmək.

Dini ibadət yerlərinin Azərbaycanın memarlıq irsinin ayrılmaz tərkib hissəsi kimi dəyərini ictimaiyyətin diqqətinə çatdırmaq və gənc nəslin bu irsə qayğılı münasibətini formalaşdırmaqdan ibarətdir.

Tədbirdən sonra aidiyyəti dövlət orqanlarının nümayyəndələri din xadimləri ilə tarixi abidənin qarşısında xatirə şəkli çəkiblər.